凶兆：會唔會係您身邊既好朋友發生?

貧友的行為1：無論佢約你/你約佢食飯去街，佢點都係提議去銅鑼灣，就算你更唔鍾意銅鑼灣都好，佢地係要去銅鑼灣，好似除左銅鑼灣之外，香港其他地方會淪陷咁既﹗試過有個fd話食飯，我話去旺角食，又平又多野揀，佢會同我講，旺角d野咁cheap都唔好食既，去過黎銅鑼灣食啦﹗而自始銅鑼灣令大家提起心入面都有一個恐怖既陰影，凶兆﹗

試探1：所以如果有人約你去銅鑼灣，你先試探下去第二度好唔好，如果佢死都係要去銅鑼灣(or佢死都要你去死一個地方既)，請打醒廿二分精神。

貧友的行為2：一個人會同你講有份工介紹俾你做，但你問佢做d咩野、公司係邊、叫咩野名、做咩野位、月薪幾多都一概唔同你講既話，淨係話：「你上黎先啦，上黎再慢慢同你講﹗」，凶兆﹗試問你打開份報紙搵工，都有人地公司名同電話/email/地址啦﹗你唔識人，人地都刊登呢d野出黎，何況人一個你識既人又咩都唔同你講？

試探2：為著你自身安全/銀包著想，再熟悉既人對你支吾其詞的話，要企硬﹗你可以話：「你唔講多d資料既，我唔會跟你去見工﹗」記住，佢只係你朋友，唔係你最親既人，更何況2~3年唔會同你聯絡既所謂朋友。
貧友的行為3：如果佢可以好流利咁講出：「我地公司係做紅酒、薰香、空氣淨化既生意，公司名叫做XXX(當然我敢寫包單佢地一定唔會講自己間公司真名出黎)，地址係銅鑼灣…」之後再會同你講一d一般人都唔太鍾意聽既野：「你睇下我，同你一齊啱啱畢業咋嘛，我家下已經搵2萬幾一個月，仲…(下刪千幾字)」一個你明知佢讀書唔成既人，無啦啦搵你講一大段自己既威水史你聽﹗凶兆﹗呢d朋友就係想你眼紅、心紅，激發你好奇心、妒忌心同貪心。你可以留意一點，佢講咁多野最後都係得一個目的：「你幾時得閒？我同你上去睇睇丫﹗」

試探3：你藉詞推拓佢一次，如果佢之後可以屢敗屢戰咁不停打俾你傾計，而傾傾下都係有一句：「你幾時得閒？我同你上去睇睇丫﹗」，請打醒廿二分精神。

貧友的行為4：如果你所謂既朋友可以同你講到一句：「喂，你仲當唔當我係你朋友先？」，即係表示佢預左透支佢既友情牌，佢預左冇你呢個fd架啦﹗凶兆﹗試問你身邊有邊個真朋友會咁樣同你講野？呢句野已經可以令到朋友關係亮起紅燈，而你再諗下佢出到呢一句的目的，居然唔係問你借錢，而只係要求你去陪佢去一個你唔知係邊既地方？仲唔係可疑？

試探4：「我實當你朋友架，但如果你都當我係真正既朋友，你老老實實同我講你帶我去邊同做咩野丫？」呢個時候礙於佢地唔可以講出自己真正既目的，佢地就會老羞成怒同你發脾氣架啦，話你唔信佢。你見到佢可以為咁少事就發脾氣，請打醒廿二分精神。


貧友的行為5：當你不幸跟左你個無啦啦搵你既fd出左去銅鑼灣話食飯(通常大家就算有共同認識的朋友，呢個飯局佢都只會每次約一個人出去)，而佢又係大家準備去食飯之際問你：「你未肚餓住架呵？我先同你去一個地方丫？」。試問聲明明大家共識左係出黎食飯，你就無啦啦俾個咁既驚喜活動，仲要你之前係唔知既？你要企係度諗一諗，眼前你呢個朋友究竟有幾耐係未見過，如果係多於3個月至1年連電話都冇聯絡過，而今次第一次見面就會有驚喜既話，凶兆﹗

試探5：「我地宜家唔係上去附近既傳銷中心架呵？」如果佢冇答你，又或者叫你堅持跟佢行﹗你問多幾次佢都係冇答既話，你唔駛打起廿二分精神，你直接打佢啦﹗

除左d舊朋友會搵你之外，自己更應該小心d不明來歷既新朋友。無錯，就算你唔會當佢地係朋友都好，佢地都會一廂情願地當左自己係你朋友﹗仲要扮到好似同你好好傾。以下新加兩個貧朋的行為。

貧友的行為6：來至一個真朋友既真實體驗。有一排我這位朋友情緒低落，獨自坐係海傍飲悶酒，有2個身穿西裝，官仔骨骨既後生仔走埋佢問下我朋友有冇事，有冇野要幫手，顯得好熱情。朋友不認識佢地，仲有點安慰認為香港仲有識關心陌生人既人，之後佢地同我朋友傾左10分鐘左右，仲交換左電話。過後幾日，果兩個靚仔打電話俾朋友約佢去食飯，不謀而合地佢地想約佢地銅鑼灣，朋友醒目，用上面的第1招試探話不如去尖沙咀啦，但係果兩個靚仔死都係要個朋友去銅鑼灣，咁我朋友已經知道咩野事，因為佢都聽聞過銅鑼灣凶險之地既事。之後幾個月，果兩個靚仔仲有勁打電話同sms俾朋友，不過朋友都沒有再接佢地電話了。發展到唔識既人都會去呃既程度，太氾濫了，凶兆﹗

試探6：呢個情況冇試探，因為根本唔會建議你地去無啦啦識一個唔係正常途徑識返黎既人﹗再唔係既，抱住懷疑心態去質問佢地係咪有目的架？因為如果真係一個對你無機心既人，佢係可以大大方方咁答你：「我無目的。」想對一個陌生人好，係唔會有限制同要求的。而且，通常會主動問你拿電話既陌生人，只有2個可能：1. 你係女仔，佢想溝你 2. 你係男仔，佢想呃你。咁當然，反之亦可啦﹗


貧友的行為7：網上搵工要小心，呢d野應該係警訊同你講，而唔應該係呢度聽返黎。現家有好多討論區既sales & marketing版(包括discuss呢度)，你都會見到有時有d post寫住「請marketing」、「想做美容行業嗎？」，你入到去看，睇到既野唔多，就係因為佢放出黎既資料唔多，好多時都會留私人電話、msn俾你，叫有興趣既人聯絡佢(就算版規寫住唔可以留聯絡方法都好)。當你聯絡左佢之後，佢就會同你講清楚，佢公司係唔會要人俾錢架，咁講無非係想你放低個戒心，等你跟佢上去一次(呢d野唔駛多，一次就夠你死了)。因為上到佢就唔會係得佢一個人昆你，而係一批人昆你。而且留意，第1次同你傾既話，佢會問你好多野先，例如幾歲，讀d咩做d咩，一個月有幾多收入，而且留意，佢一定會係第一次傾就想同你約定幾時上去架啦，凶兆﹗因為佢地真係好心急，唔想你拖得耐俾你搵到d負面消息。

試探7：你見到呢d post大可係討論區回覆問下佢實際做d咩野，公司係邊。如果佢話：「呢度好難講得清楚/太長唔想打，你留個方法我同你慢慢講啦。」睇到呢d時，請你打醒廿二分精神了。

只要留意手法，都係大同小異的﹗
多d朋友知，佢地就會少一點成功的機會。
如果你係返緊學既，去Computer Center印十張
如果你係返公司既，都印一點出來，放入屋企隔離幾個信箱，俾一d家庭沒有電腦或者唔識上網既人知道
你做少少野，可能就已經會阻止到一個家庭既悲劇
如果您地都唔介意既，可以發起一個連鎖信行動，一傳十，十傳百，務求香港的市民都起碼對呢樣野有認識。只要不良傳銷公司再找唔到人落搭，冇人供會，自然會瓦解。

实在！贴心！好！
--完--